Hvað á hinsegin fólk, fatlað fólk, fólk af erlendum uppruna og feitt fólk sameiginlegt? Hvernig geta þessir hópar unnið saman og lært hvor af öðrum? Þessum spurningum og fleirum verður velt upp á ráðstefnunni Truflandi tilvist þann 3. og 4. mars næstkomandi. Aðalfyrirlesari er Lydia XZ Brown, Autistic Hoya. Hán er bandarískur aktívisti og laganemi af asískum uppruna, einhverft, fatlað, eikynhneigt og kynsegin. Hán hefur verið virkt í mannréttindabaráttu vestanhafs um árabil og hvetjum við sem flest áhugafólk um mannréttindi til að láta fyrirlestur háns ekki fram hjá sér fara. Þrátt fyrir ungan aldur er Lydia eftirsóttur fyrirlesari og þekkt fyrir afdráttarlausa og ferska sýn á mannréttindabaráttu jaðarsettra hópa. Smelltu hér til að skrá þig á ráðstefnuna. Föstudagurinn 3. mars í Norræna húsinu: Fyrirlestur Lydiu XZ Brown verður haldinn föstudaginn kl. 10 og að honum loknum verða pallborðsumræður og örfyrirlestrar með fólki úr íslensku grasrótarstarfi. Þessi hluti ráðstefnunnar er öllum opinn og bjóðum við fagfólk og fólk úr stjórnsýslunni sem vinnur að mannréttindamálum sérstaklega velkomið. Drög að dagskrá: 10.00-11.30 Fyrirlestur Lydiu Brown 11.30-12.00 Spurningar og umræður 12.00-13.15 Hádegishlé 13.15-16.00 Truflandi líkamar: pallborð, örfyrirlestrar og umræða með íslenskum mannréttindaaktívistum úr mörgum áttum. 16.00-17.00: Hamingjustund á Stúdentakjallaranum Laugardagurinn 4. Mars í Tin Can Factory, Borgartúni 1: Þennan dag heldur Lydia vinnustofur og tækifæri gefst til að vinna að kröfuskjali til íslenskra stjórnvalda. Þessi hluti ráðstefnunnar er eingöngu ætlaður fólki sem tilheyrir jaðarsettum eða valdaminni hópum, t.d. fötluðu fólki, hinsegin fólki, konum, feitu fólki, fólki af erlendum uppruna, og aktívistum sem starfa með félagasamtökum sem vinna að mannréttindamálum. Gott tækifæri til að stækka tengslanet sitt og vinna að samstöðu jaðarsettra hópa. Drög að dagskrá: 13.00-13.15 Samhristingur 13.15-16.00 Vinnustofa með Lydiu Brown 16.00-16.30 Hlé 16.30-18.00 Vinnustofur: Aktívistar deila ráðum og reynslu. Kröfuskjalsgerð 18.00-18.30 Þátttökutónlistaratriði 18.30-20.00 Vegan kvöldverður 20.00-23.00 Tengslamyndun og teiti. Ráðstefnan er haldin í samvinnu Samtakanna '78, Trans Íslands og Tabú. Hún er styrkt af Velferðarráðuneytinu.
