Innanríkisráðuneytið óskaði á dögunum eftir umsögnum um tillögur starfshóps um framtíðarskipan lögreglumenntunar á Íslandi. Tillögurnar gera m.a. ráð fyrir þriggja ára námi á háskólastigi, að skólinn verði sjálfstæð eining en menntun að stórum hluta útvistað til menntakerfis og að skólinn verði fræðslu- og rannsóknarsetur lögreglu. Samtökin ’78 sendu inn eftirfarandi umsögn: Samtökin ´78 fagna háleitum markmiðum í menntun lögregluþjóna á Íslandi en vilja um leið minna á og árétta mikilvægi þess að almenn mannréttindafræðsla og hinsegin fræði fái veigamikinn sess í hinu nýja námi. Viðbrögð og úrvinnsla hatursglæpa vegur þar þungt en ekki síður þekking á réttri orðanotkun og skilningur á jaðarhópum hinsegin samfélagsins á Íslandi. Sem dæmi má nefna trans fólk en sá hópur er einkar útsettur fyrir fordómum og ofbeldi. Hjá Samtökunum ´78 starfar fjölbreytt teymi fagfólks sem hefur mikla reynslu af því að taka á móti einstaklingum í ráðgjöf sem og að miðla og fræða í menntastofnunum sem og í atvinnulífinu. Vilja Samtökin ´78 koma á framfæri áhuga á samstarfi er kemur að því að móta og miðla hinsegin fræðslu til lögregluþjóna framtíðarinnar.
