Til hamingju Styrmir! 14. apríl, 2011 Íþróttafélagið Styrmir hefur verið tilnefnt vegna góðra verka til samfélagsverðlauna Fréttablaðsins í flokkinum „Til atlögu gegn fordómum“. Umfjöllun um málið má lesa í Fréttablaðinu í dag á bls. 14. Þrír einstaklingar eða félagasamtök koma til greina í hverjum flokki. Síðar í dag kemur í ljós hver hlýtur verðlaunin. Í umfjöllun Fréttablaðsins segir: „Einkunnarorð Íþróttafélagsins Styrmis eru fyrirmyndir ekki staðalímyndir. Uppruna félagsins má rekja til þess að nokkum hommum var safnað saman til að spila fótbolta á Klambratúni fyrir tæpum fimm árum. Óhætt er að segja að boltinn hafi rúllað síðan og og nú skipta meðlimir Styrmis tugum og æfðar eru þrjár greinar undir merkjum félagsins: fótbolti, sund og blak. Markmið Styrmis er að ná góðum árangri í keppni en um leið að setja þátttöku ofar sigri.“ Félagsstarfið er auðvitað okkur sjálfum mikilvægt en ánægjulegt er að sjá að áhrifa þess gætir einnig út á við. Það hvetur aðra í samfélaginu til dáða og vekur athygli sem kraftmikið starf. Teljum við mikilvægan þátt í atlögu gegn fordómum að allir taki þátt í íþróttum óháð kynhneigð á fordómalausum grunni. Gagnkynhneigðir vinir hafa í gegnum árin gengið til liðs við Styrmi og er það ánægjuleg þróun.
