Spennuþrungið kvöld í Iðu

Skammdegið er tími glæpasagna og spennu. Núna hafa spenntir lesendur um margar góðar sögur að velja. Þær verða kynntar á upplestrarkvöldi á kaffihúsinu Súfistanum í IÐU-húsinu við Lækjargötu á miðvikudagskvöld, 4. nóvember. Upplesturinn hefst kl. 20. Ragnhildur Sverrisdóttir blaðamaður ætlar að ríða á vaðið og lesa upp úr bókinni SEX GRUNAÐIR eftir Vikas Swarup, í þýðingu Ísaks Harðarsonar. Þeir sem lásu metsölubókina Viltu vinna milljarð vita að Swarup kann að segja áhugaverðar sögur frá Indlandi og þessi bók gefur henni ekkert eftir. Rithöfundarnir Viktor Arnar Ingólfsson og Stefán Máni lesa báðir upp úr bókum sínum. Viktor Arnar sendir núna frá sér SÓLSTJAKA, eftir fjögurra ára bókahlé, en hann er einn þeirra höfunda sem ýttu íslensku glæpabylgjunni af stað. Stefán Máni sendi frá sér Ódáðahraun í fyrra og nú er komið að HYLDÝPI, sem gefur fyrri bókum hans ekkert eftir. Að lokum les Freyr Eyjólfsson upp úr nýjustu bók spennusagnameistarans Arnaldar Indriðasonar. Erlendur, Elínborg og Sigurður Óli birtast öll á síðum nýju bókarinnar, sem heitir SVÖRTULOFT.

Verið velkomin á bókakvöld í IÐU